48th National Disability Rights Week

Karon nga bulan sa Hulyo, ang tibuok Pilipinas nagasaulog sa 48th National Disability Rights Week, usa ka selebrasyon nga nagpasiugda sa pagpanalipod sa katungod, dignidad, ug kaayohan sa mga Persons with Disabilities (PWDs).

Dinhi sa LGU Prosperidad, ubos sa liderato ni Mayor Frederick Mark P. Mellana, nahimo nang usa ka maayong tradisyon ang paghatag og espesyal nga pagtagad sa PWD sector matag bulan sa Hulyo. Pinaagi sa MSWDO Prosperidad, gipahigayon ang Gift Giving ug Pagpangumusta sa atong mga igsoon nga PWD, ilang mga caregivers, ug mga miyembro sa pamilya aron ipakita nga ang lokal nga panggamhanan nagpadayon sa pag-amuma, pag-atiman, ug pag-ila sa ilang bili isip kabahin sa katilingban.

Niining tuiga, napulo (10) ka Persons with Disabilities nga adunay multiple disabilities ug bedridden gikan sa nagkadaiyang barangay sa lungsod ang nabahinan og Family Food Packs, isip simbolo sa pagpakabana ug suporta sa ilang pang-adlaw-adlaw nga panginahanglan.

Dako usab ang among pagpasalamat sa Special Action Force (SAF) ubos sa pagpanguna ni Capt. Eli Chumacog, Commanding Officer sa 8th Company, SAF, sa ilang walay pagduha-duhang suporta ug pagpakig-alayon aron mahimong malampuson ang maong kalihokan.

Sa LGU Prosperidad, nagpadayon ang among paningkamot sa pagtukod og usa ka komunidad nga inklusibo, malasakiton, ug walay biya sa pag-alagad sa tanan, ilabi na sa atong mga PWD.

USWAG PROSPERIDAD!