MPDSO Nagpasayon sa Proseso sa Pagkuha sa Locational Clearance pinaagi sa Step-by-Step nga Giya

Aron mas mapadali ug masabtan sa publiko ang proseso sa pagkuha sa Locational Clearance, ang Municipal Planning and Development Services Office (MPDSO) sa Munisipyo sa Prosperidad nagpagawas og step-by-step nga giya alang sa tanang aplikante.

Ang Locational Clearance usa ka opisyal nga dokumento nga gipagawas sa MPDSO nga nagpamatuod nga ang usa ka giplanong proyekto o kalamboan nahiuyon sa Comprehensive Land Use Plan (CLUP) ug Zoning Ordinance sa Munisipyo. Kini usa sa mga importante nga kinahanglanon sa dili pa makakuha og Building Permit ug uban pang development permits.

Aron mahimong hapsay ang proseso sa aplikasyon, gikinahanglan nga sundon ang mosunod nga mga lakang:

Lakang 1 – Pag-apply. Adtoa ang MPDSO ug isumite ang husto ug kompleto nga aplikasyon uban sa tanang gikinahanglang dokumento.

Lakang 2 – Ebalwasyon. Susihon sa MPDSO ang imong aplikasyon aron maseguro nga ang giplanong proyekto nahiuyon sa CLUP ug sa Zoning Ordinance sa Munisipyo.

Lakang 3 – Site Verification. Kon gikinahanglan, maghimo ang MPDSO og site inspection aron ma-validate ang lokasyon sa proyekto ug ang pagkatakdo niini sa gisumiteng plano.

Lakang 4 – Pagbayad. Human sa ebalwasyon, kinahanglan nga bayran ang gikinahanglang filing fee ug Locational Clearance fee sa Municipal Treasurer’s Office.

Lakang 5 – Pag-release sa Locational Clearance. Kon kompleto na ang tanang dokumento ug naaprubahan na ang aplikasyon, mahimo nang makuha sa aplikante ang iyang Locational Clearance sa MPDSO.

Gipahinumdoman usab sa MPDSO ang tanang aplikante nga sigurohong kompleto ang tanang dokumento sama sa notarized application form, Barangay Certification as to Land Use, proof of ownership o land title, tax declaration, sketch plan, site development plan, floor plan, bill of materials, tax clearance, ug uban pang gikinahanglan nga dokumento aron malikayan ang paglangan sa proseso.

Importante nga pahinumdom: Ang Locational Clearance dili Building Permit. Kini usa lamang sa mga kinahanglanon aron makapadayon sa pagkuha og Building Permit ug uban pang development permits.

Pinaagi niini nga inisyatiba, ang Municipal Planning and Development Services Office (MPDSO) nagpadayon sa paghatag og episyente, transparent, ug kalidad nga serbisyo sa katawhan, samtang gisiguro nga ang tanang kalamboan sa Munisipyo sa Prosperidad nahiuyon sa husto nga land use planning ug zoning regulations.

DIO: JASON C. COTIANGCO